वसमत उपविभागीय अधिकारी कार्यालयात ०१ मे महाराष्ट्र दिन निमित्त ध्वजारोहण संपन्न

वसमत उपविभागीय अधिकारी कार्यालयात उत्साहात ध्वजारोहण
वसमत विधानसभेचे लोकप्रिय आमदार राजुभैय्या नवघरे यांच्या हस्ते मानवंदना.

वसमत प्रतिनिधी

दि.१ मे महाराष्ट्र दिन आणि कामगार दिनाचे औचित्य साधून वसमत शहरात ठिकठिकाणी मोठ्या उत्साहात ध्वजारोहण सोहळे संपन्न झाले. येथील उपविभागीय अधिकारी कार्यालय परिसरात आयोजित मुख्य शासकीय कार्यक्रमात आमदार राजुभैय्या नवघरे यांच्या शुभहस्ते ध्वजारोहण करण्यात आले.
यावेळी व्यासपीठावर उपविभागीय अधिकारी मा.श्री.विकास माने साहेब यांची प्रमुख उपस्थिती होती.ध्वजारोहना नंतर राष्ट्रगीत आणि राज्यगीताच्या सुरांनी परिसर मंत्रमुग्ध झाला होता.त्यानंतर उपस्थित सर्वांनी’जय महाराष्ट्र’च्या घोषणा दिल्या,ज्यामुळे संपूर्ण कार्यालय परिसर देशभक्तीच्या आणि अस्मितेच्या भावनेने दुमदुमून गेला होता.
या प्रसंगी बोलताना आमदार राजुभैय्या नवघरे म्हणाले की,”महाराष्ट्र दिन हा संयुक्त महाराष्ट्र चळवळीतील हुतात्म्यांच्या बलिदानातून आणि त्यागातून साकारलेला दिवस आहे.छत्रपती शिवाजी महाराजांच्या स्वराज्याच्या संकल्पनेपासून सुरू झालेला हा प्रेरणादायी प्रवास आज आधुनिक महाराष्ट्राच्या प्रगतीपर्यंत पोहोचला आहे.हा दिवस आपल्याला आपल्या संस्कृतीचा अभिमान आणि भविष्यातील जबाबदारीची जाणीव करून देतो.”
पुढे बोलताना त्यांनी वसमत मतदारसंघाच्या विकासाप्रती आपली कटीबद्धता व्यक्त केली.”वसमतच्या जनतेच्या सर्वांगीण प्रगतीसाठी आणि या भागाच्या उन्नतीसाठी मी सदैव कटिबद्ध राहण्याचा निर्धार आजच्या पवित्र दिनी व्यक्त करतो,”असेही त्यांनी नमूद केले.
या सोहळ्याला तालुक्यातील विविध विभागांचे अधिकारी, कर्मचारी,प्रतिष्ठित नागरिक आणि मान्यवर मोठ्या संख्येने उपस्थित होते.प्रशासनाच्या वतीने उपविभागीय अधिकारी विकास माने यांनी उपस्थितांचे स्वागत केले.कार्यक्रमाची सांगता उपस्थित नागरिकांना महाराष्ट्र दिनाच्या शुभेच्छा देऊन करण्यात आली.

महाराष्ट्र दिन हा केवळ उत्सव नसून आपल्या प्रगतीची आणि गौरवशाली इतिहासाची आठवण करून देणारा दिवस आहे.